Hindi bababa sa anim na bagyo ang inaasahang dumating sa bansa sa pagtatapos ng 2011, ayon kay Philippine Atmospheric, Geophysical and Astronomical Services Administration (PAGASA) Undersecretary Graciano Yumul.
Sa isang panayam kaninang umaga sa Broadcasters’ Forum na ginanap sa Hotel Rembrandt sa Lungsod ng Quezon, sinabi ni Yumul na inaasahan ang malalakas na bagyo sa pagpasok ng mga tinaguriang “-ber months”.
Ang mga buwan ng Setyembre ay Oktubre ay ang pagpapalit ng hanging habagat sa hanging amihan.
Paliwanag ni Yumul, ang hanging habagat na karaniwang dumadating tuwing panahon ng tag-init (“summer”) ang nagdadala ng maalinsangang hangin sa bansa.
Ang hanging amihan naman, sa kabilang banda, any nagdudulot ng malamig na hangin na madalas ay higit na nararamdaman sa buwan ng Nobyembre hanggang Pebrero. Nanggagaling ang hanging amihan sa mga Bansang Russia at Hapon.
Nagbabala naman ang PAGASA na mayroong siyam na bagyo ang inaasahang tumama sa bansa hanggang sa katapusan ng taon: apat dito ay inaasahan sa Setyembre, isa hanggang dalawa sa mga buwan ng Oktubre at Nobyembre, at isa sa Desyembre.
Malaki ang posibilidad na sa Gitnang Luzon at Kamaynilaan tumama ang mga bagyo, gaya ng mga nagdaang bagyo ng nakaraan mga taon, dagdag ni Yumul.
Ipinagbigay-alam din ni Yumul na nakasalalay sa kanilang mga datos ang kanilang ulat at ang mga ito ay maaring magbago depende sa galaw ng bagyo kaya’t dapat ay laging nakatutok ang mga mamamayan sa bagong ulat ng PAGASA.
Walang komento:
Mag-post ng isang Komento